ယွၼ်ႉမီးလွင်ႈယုမ်ႇယမ်ၵၼ်သေ ၸၢင်ႈၵမ်ႉယၼ်ပၼ်ႁႅင်း ႁဵတ်းႁႂ်ႈ တွၼ်ႈၼႃႈၵၢၼ်တႃငၢၼ်းၼၼ်ႉ ၸၢင်ႈၵႂၢင်ႈၶႂၢင်မႃးလိူဝ်ၵဝ်ႇ၊ ၼႂ်းၵၢၼ်ၶဝ်ႈဢွၵ်ႇၵပ်းသိုပ်ႇတူင်ႇဝူင်းဢူၺ်းၵေႃႉၵေႃႈ ၶႅမ်ႈလႅပ်ႈလီ၊ တေႃႈၼင်ႇၼၼ် တီႈမုင်ႉႁေႃႁိူၼ်းၸဝ်ႈၵဝ်ႇၵေႃႈ ယိုင်ႈႁဵတ်းႁႂ်ႈဢုၼ်ႇဢူၵ်းဢုၼ်ႇၸႂ်ၶိုၼ်ႈမႃးလိူဝ်ၵဝ်ႇသေ တီႈၼိူဝ်ၸူႉႁၵ်ႉၵေႃႉပႅင်း ၼၼ်ႉၵေႃႈ ႁဵတ်းႁႂ်ႈတိူဝ်းမီးမျႅတ်ႈတႃႇၵရူႉၼႃႇႁၵ်ႉႁွမ်ၼမ်ၶိုၼ်ႈမိူၼ်ၵၼ်ၼႆ ၽႂ်ၽႂ်ၵေႃႈယွမ်းႁပ်ႉၵၼ်။
ၽႂ်ဢမ်ႇၽႂ်ၵေႃႈ ႁူႉၵႃႈၶႂ်ႈမီးမိတ်ႉသေ ဢွၼ်သၢင်ႈလွင်ႈယုမ်ႇယမ်တေႃႇၵၼ် ၼႆႁင်းၽႂ်မၼ်းသေတႃႉ ၵူၺ်းၵေႃႈ ၵူၼ်းၵမ်ႈၽွင်ႈၶဝ် ၸၢင်ႈဢဝ်လွင်ႈယုမ်ႇယမ်ၼၼ်ႉ လူမ်ႉလႅဝ်ပႅတ်ႈလႆႈလႄႈ ယွၼ်ႉၼၼ် ၼင်ႇႁိုဝ်ၵေႃႉၼိုင်ႈတင်းၵေႃႉၼိုင်ႈ တေၸၢင်ႈၵေႃႇသၢင်ႈလွင်ႈယုမ်ႇယမ်တေႃႇၵၼ်လႆႈ ႁႂ်ႈမၼ်ႈၵိုမ်းယိုၼ်းယၢဝ်းၼၼ်ႉတႄႉ ႁူႉၵႃႈၸဝ်ႈၵဝ်ႇလူဝ်ႇလႆႈပၼ် လွင်ႈယုမ်ႇယမ် ပိူၼ်ႈတၢင်ႇၵေႃႉဢွၼ်တၢင်းသေ မေႃယူႇႁႂ်ႈၵိုင်ႇထိူၵ်ႈ တင်းလွင်ႈယုမ်ႇယမ်ၼၼ်ႉယူႇ။ ပိူင်လူင်တႄႉ တၢင်းႁဵတ်းႁႂ်ႈမိူၼ်တင်းတၢင်းလၢတ်ႈသေ သၢင်ႈႁႂ်ႈၵူၼ်းတၢင်ႇၵေႃႉ ယုမ်ႇယမ်ဝႆႉဝၢင်းၸႂ်ၵႂႃႇႁင်းၶေႃၼၼ်ႉ ထုၵ်ႇမႅၼ်ႈသုတ်းယဝ်ႉ။
မိူဝ်ႈၵပ်းသိုပ်ႇတိတ်းတေႃႇ ပွင်းၽေႃႇၵူၼ်းတၢင်ႇၵေႃႉၼၼ်ႉၵေႃႈ တေႃႈၼၼ် ဢမ်ႇလီမီးၸႂ်ထၢင်ႇထိူမ်တေႃႇၵၼ်၊ ၸၢင်ႈၺႃးလႅၼ်ယူဝ်ႉၼႆ ၵဝ်ႁူႉယူႇဝႃႈမႂ်းတေထၢမ် ၵူၺ်းယႃႇပေမႆႈၸႂ်သင်၊ သင်မၼ်းပဵၼ်ၵူၼ်းမေႃလႅၼ်ၸိုင် လွင်ႈႁဵတ်းတၢင်းသၢင်ႈမၼ်း တေၼႄၶိုၼ်းၸႃႇတိမၼ်း ပၼ်မႂ်းႁၼ်ယူႇ ပေႃးၼၼ် မႂ်းၵေႃႈယႃႇပေသိုပ်ႇယုမ်ႇယမ်ထႅင်ႈပွၵ်ႈသွင်လႄႈ။ လွင်ႈယႂ်ႇတႄႉ ယႃႇပေႁႂ်ႈၸဝ်ႈၵဝ်ႇပဵၼ်ၽၢႆႇလႅၼ်ဢွၼ်တၢင်း။
ၵူၺ်းၵႃႈ ဢၼ်ၶႂ်ႈပၼ်ၾၢင်ႉမႂ်းထႅင်ႈ ဢၼ်ၼိုင်ႈတႄႉ လူဝ်ႇႁူႉဝႆႉဝႃႈ ယွၼ်ႉၵႃႈၶၼ်လွင်ႈယုမ်ႇယမ်ၼႆႉ ယိုင်ႈယႂ်ႇႁႅင်းၼႃႇလႄႈ မႂ်းယႃႇပေဢဝ်ၸၢတ်ႈပၢၼ်မႂ်းတင်းပိုၵ်း ၽင်ၶဝ်ႈၵႂႃႇလွင်းၸွမ်းၼၼ်ႉၵူၺ်း။ ၸိူင်ႉႁိုဝ်လႄႈဝႃႈၼၼ်ၼႆ သင်မႂ်းဢဝ်ၶူဝ်းၶွင်ဢုၵ်ႉၸႃႇတီႈမႂ်းမီး ၵႂႃႇလူင်းတိုၼ်းလၢင်းၸွမ်းတင်းမူတ်း မိူၼ်တင်းမႂ်းဢဝ်ၽဝၸၢတ်ႈပၢၼ်မႂ်း ၵႂႃႇၽၢၵ်ႇဝႆႉၼႂ်းမိုဝ်း ၵေႃႉမႂ်းယုမ်ႇယမ်ၼၼ်ႉလုမ်းလုမ်းၵူၺ်းယဝ်ႉ။ ဢၼ်ၼႆႉပၼ်လွင်ႈယုမ်ႇယမ် ဢမ်ႇၸႂ်ႈသႄႈ ပဵၼ်ၵၢၼ်တေႃႇလွင်းၵူၺ်းလႄႈ သင်မႂ်းထုၵ်ႇမၼ်းလႅၼ်ၵႂႃႇၸိုင် ႁူႉၵႃႈမႂ်းသုမ်းလုမ်းလုမ်းသေ တင်းၽဝၸၢတ်ႈပၢၼ်မႂ်း လိူဝ်သေမုၼ်ႈၽဝ်ႇဢွၼ်ႇၼၼ်ႉ ႁိုဝ်ၵိုတ်းသင်။
တူဝ်ယၢင်ႇမၼ်းဢၼ်ၼိုင်ႈတႄႉ မိူၼ်မၢဝ်ႇတင်းသၢဝ်ယဝ်ႉ၊ သူပ်းတေႉဝႃႈႁၵ်ႉလူၼ်ႉဢူၵ်းမူတ်းၸႂ်ၼႆသေ ဝၢႆးလႆႈဢၼ်ၶႂ်ႈလႆႈယဝ်ႉၵေႃႈ ႁိုဝ်ၵႂႃႇသူႇယွၼ်း ၸွမ်းၼင်ႇပၼ်ၵႂၢမ်းမၼ်ႈဝႆႉဝႃႈ တေၵူပ်ႉၵူႈၵၼ်တင်းမႂ်းၼၼ်ႉ၊ ၵူၺ်းဢဝ်ၽဝပၢၼ်သၢဝ်ဢွၼ်ႇမႂ်းသုမ်းၵူၺ်းႁိုဝ်လႃႇ။ လွင်ႈၼႆႉယွၼ်ႉမႂ်း ယုမ်ႇယမ်တင်းပိုၵ်းသေ မႂ်းဢဝ်ၸၢတ်ႈပၢၼ်မႂ်း ၶဝ်ႈၵႂႃႇတေႃႇလွင်းၸွမ်းၼၼ်ႉယဝ်ႉ။
ယွၼ်ႉၼၼ် သင်တေဢမ်ႇပဵၼ်ၵၢၼ် ႁဵတ်းႁႂ်ႈၸၢတ်ႈပၢၼ်ဢွၼ်ႇမႂ်း ယွၵ်းယွႆႈတူၵ်းသုမ်းလုမ်းလုမ်းၸိုင် ထုၵ်ႇလီၸၢမ်းယုမ်ႇယမ်ပၼ်ယူႇ၊ ဝၢႆးသေမႂ်းယုမ်ႇယမ်ပၼ်ယဝ်ႉ သင်မၼ်းပဵၼ်ၵူၼ်းလႅၼ်ၸိုင် ၸႃႇၸိမၼ်းတေၼႄမႃး ႁင်းၵူၺ်းယူႇဢမ်ႇႁၢင်ႉ။ ၸင်ႇဝႃႈ လွင်ႈယုမ်ႇယမ်ၼႆႉ သင်ထုၵ်ႇယႃႉလူႉသေ ပွၵ်ႈၼိုင်ႈၵူၺ်းၵေႃႈ ဢမ်ႇၸၢင်ႈၵေႃႇသၢင်ႈလႆႈၶိုၼ်းမႂ်ႇယဝ်ႉ။ သင်သၢင်ႈလႆႈၶိုၼ်းၵေႃႈ တေၸၢင်ႈယၢပ်ႇယဵၼ်းသေ ႁူႉတေဢမ်ႇတဵမ်ပၢၵ်ႇ မိူၼ်ပွၵ်ႈၼိုင်ႈဢမ်ႇၵႃး ႁူႉၵႃႈတေလႆႈဝႆႉသတိ လူၺ်ႈထၢင်ႇထိူမ်တႃႇသေႇသေ ၵပ်းသိုပ်ႇၵၼ်ၵႂႃႇတေႃႇၸူဝ်ႈယူႇ။ ယွၼ်ႉၼၼ် ၸင်ႇဝႃႈ လွင်ႈယုမ်ႇယမ်ၼႂ်းၵႄႈၵေႃႉၼိုင်ႈလႄႈ တင်းၵေႃႉၼိုင်ႈၼႆႉ မိူၼ်တင်းဢဝ်မၢၼ်ႇသႂ်မၢင်မၢင်ဢွၼ်ႇ ၶႅၼ်ႈဝႆႉၵူၺ်းၼႆ။ သင်လႆႈၸတ်ႉငၢၵ်ႈတႅၵ်ႇၵွႆယဝ်ႉ ႁိုဝ်ၸၢင်ႈၵပ်းၸပ်းလႆႈၶိုၼ်းဢမ်ႇၵႃး သိၵ်ႈမၢၼ်ႇတႅၵ်ႇၼၼ်ႉ ယင်းၸၢင်ႈမေႃတိူဝ်ႉမၢတ်ႇ ထိုင်ၸၼ်ႉဢွၵ်ႇလိူတ်ႈ ဢွၵ်ႇယၢင် လႆႈပႃးၵွၼ်ႇၼႆၼၼ်ႉ ႁႂ်ႈလႆႈယွၼ်းသမ်ႉထႅင်ႈသေၵမ်း။
လိုၼ်းသုတ်း ဢၼ်ၶႂ်ႈလၢတ်ႈတႄႉ လွင်ႈယုမ်ႇယမ်ၵေႃႉၼိုင်ႈလႄႈၵေႃႉၼိုင်ႈၼႆႉ လမ်ႇလွင်ႈဢိူဝ်ႈ၊ ယွၼ်ႉၼၼ် လွင်ႈလၢတ်ႈလႄႈလွင်ႈႁဵတ်းၸဝ်ႈၵဝ်ႇၵေႃႈ ႁႂ်ႈၵိုင်ႇထိူၵ်ႈတင်း လွင်ႈယုမ်ႇယမ်သေၵမ်း။ ပေႁႂ်ႈၸဝ်ႈၵဝ်ႇ ပဵၼ်ၽၢႆႇတႄႇႁဵတ်းမႅၼ်ႈဢွၼ်တၢင်း။ ဢၼ်ထုၵ်ႇလီယုမ်ႇၼၼ်ႉၵေႃႈယုမ်ႇသေ ထုၵ်ႇလီဝူၼ်ႉၶႆႈၸိူင်ႉႁိုဝ်ၵေႃႈဝူၼ်ႉသေ ၵူၺ်းပေဢဝ်ၽဝၸၢတ်ႈပၢၼ်ၸဝ်ႈၵဝ်ႇတင်းပိုၵ်း ၶဝ်ႈၵႂႃႇၽင်ႁဵတ်းၸိူင်ႉၵၢၼ်တေႃႇလွင်းၵူၺ်းၵေႃႈပေႃးယဝ်ႉ။ ယွၼ်းႁႂ်ႈၵူႈၵေႃႉမေႃတိဝ်ႈၸင်ႈဝူၼ်ႉၵျၢမ်ႇၵႂႃႇႁင်းၽႂ်မၼိးသေၵမ်းၼႆ ၶႂ်ႈတိုၵ်းသူၼ်းယူႇဢေႃႈ။
ပေႃးမႃးလၢတ်ႈလွင်ႈတေႃႇလွင်းၼႆႉသေ ၵႂႃႇၶုၵ်းၸႂ်လႆႈၶိုၼ်း ၶေႃႈၵႂၢမ်း ၶုၼ်လဵၵ်ႉၸၼ်ႊပၢၵ်ႇလႅင် ဢၼ်ၶႃႈယၢမ်ႈတူၺ်းမႅၼ်ႈ ၼႂ်းလၢႆးၵၢၼ်ထႆးသႂၢင်ႉသၢမ်(CH-3) ၶၢႆၶွမ်ႊလပ်ႉ ၵဵဝ်ႇလွင်ႈၵူၼ်းလႅၼ်ၽၢႆႉ မိူဝ်ႈပီႊ-2013 ၼၼ်ႉသေ မၼ်းလၢတ်ႈၵႂႃႇဝႃႈ- ၺႃးၸူၼ်သိပ်းပွၵ်ႈ တင်းၵိုတ်းႁိူၼ်း၊ ၾႆးမႆႈသိပ်းပွၵ်ႈ တင်းၵိုတ်းလိၼ်၊ လဵၼ်ႈၵၢၼ်တေႃႇလွင်းပွၵ်ႈလဵဝ် ဢမ်ႇၵိုတ်းႁိူၼ်း ဢမ်ႇၵိုတ်းလိၼ် ဢမ်ႇၵိုတ်းသင်ႁႂ်ႈတူၺ်းၼႆသေ ၸင်ႇမႃးၾၢၵ်ႇၵၼ်ပႃး ၽွင်းလူပ်းလိုၼ်းယူႇဢေႃႈ။
Quotation | Bawa
19-Aug-2021
No comments:
Post a Comment