ၺႃးမိူဝ်ႈမီးၵူၼ်းသေၵေႃႉ ယွၼ်းတၢင်းၸွႆႈထႅမ်မႃးၼၼ်ႉ ၵမ်ႈၼမ်ယွၼ်ႉၵူဝ်ၸႂ်ပိူၼ်ႈဢမ်ႇလီ၊ ၵူဝ်ပိူၼ်ႈႁူပ်ႉတၢင်းယၢပ်ႇၽိုတ်ႇ၊ ၵူဝ်ႈၼႃႈၵၢၼ်တႃႈငၢၼ်းပိူၼ်ႈ ဢမ်ႇထိုင်တီႈၼႆသေ ၸဝ်ႈၵဝ်ႇၵႆႉလႄႇပၼ်ၵတိ ႁပ်ႉၸွႆႈပၼ်ယူႇတႃႇသေႇ ၵူၺ်းၵႃႈမၢင်ပွၵ်ႈမႃးၼႆႉ ယွၼ်ႉလွင်ႈႁပ်ႉသေ ဢၼ်ၸဝ်ႈၵဝ်ႇဢမ်ႇၶႂ်ႈလႆႈၶႂ်ႈပဵၼ်ၼၼ်ႉ ၸၢင်ႈမေႃသူႇၸူးထိုင်တူဝ်ဢိူဝ်ႈ၊ ၵမ်းလိုၼ်ၸၢင်ႈလႆႈတၢင်းၼႅင်ၸႂ်၊ ႁဵတ်းႁႂ်ႈဢိုတ်ႇဢၢတ်ႇ တုၵ်ႉၸႂ်ၶၢၼ်ၶေႃး၊ လွင်ႈပၢႆးဝူၼ်ႉဢမ်ႇလီၵေႃႈ ၸၢင်ႈၶဝ်ႈမႃးၼႂ်းႁူဝ် ထိုင်တီႈႁဵတ်းႁႂ်ႈ ထၢတ်ႈၸႂ်တူၵ်းလႆႈ လူးၵွၼ်ႇယဝ်ႉ။ ယွၼ်ႉၼၼ် ၵၢၼ်ဢဝ်ၶၢဝ်းယၢမ်းသုၼ်ႇတူဝ်ပၼ်ပိူၼ်ႈမၢင်မိူဝ်ႈၼၼ်ႉ ၸၢင်ႈႁိူဝ်ႉလၢႆသုမ်းယၢမ်းၵူၺ်းၼႆ။ တီႈဢၼ်ၸဝ်ႈၵဝ်ႇ ဢမ်ႇႁပ်ႉၼၼ်ႉၵေႃႈ ဢမ်ႇၸႂ်ႈဝႃႈ ၸဝ်ႈၵဝ်ႇဢမ်ႇလီဢမ်ႇမီးၵရူႉၼႃႇ ပိူင်လူင်မၼ်းတႄႉ ၸဝ်ႈၵဝ်ႇလူဝ်ႇလႆႈသိုဝ်ႈယူဝ်း ၵူၺ်းဢေႃႈ။
ယွၼ်ႉၼၼ်ၸဝ်ႈၵဝ်ႇ လီမႄးထတ်းသၢင်တူၺ်းၶိုၼ်းတူဝ်ၵဝ်ႇယူႇ။ ၸိူင်ႉႁိုဝ်လႄႈၼႆ မိူဝ်ႈမီးသေၵေႃႉ ယွၼ်းတၢင်းၸွႆႈထႅမ်မႃး ႁႂ်ႈပၼ်ၶၢဝ်းယၢမ်းၼၼ်ႉ ၵၢင်ၸႂ်ၸဝ်ႈၵဝ်ႇသမ်ႉမီးၸိူင်ႉႁိုဝ် ပဵၼ်ၸိူင်ႉႁိုဝ်ၼႆ လီလႆႈၾၢင်ႉတူၺ်းၶိုၼ်း၊ ဢမ်ႇမီးလွင်ႈတၢင်းသင်တေႉတေႉဝႃႈသေ ဝူၼ်ႉဝႃႈႁူဝ်ၶႆႈၶိုၼ်ႈမႃးၸိုင် ႁူႉၵႃႈဢမ်ႇလီႁပ်ႉ။ ပေႃးယဝ်ႉယႃႇလိုမ်းထၢမ်တူၺ်းၶိုၼ်း တူဝ်ၵဝ်ႇဝႃႈ ၸဝ်ႈၵဝ်ႇ တေၸၢင်ႈၸွႆႈထႅမ်ပၼ်လႆႈတႄႉယူႇႁႃႉ၊ ပဵၼ်လူးၸွင်ႇသမ်ႉတေပဵၼ်လႆႈ၊ သင်ၶေႃႈထၢမ်တွပ်ႇတူဝ်ၵဝ်ႇ ဢမ်ႇပေႃးၸႅင်ႈလႅင်း ဝင်ႇဝိူဝ်ႈဝႆႉၼႆ လီလႆႈပၼ်ၶၢဝ်းယၢမ်းသေ ဝူၼ်ႉၶွပ်ႈလၢႆႁွပ်ႈ တႃႇတွပ်ႇႁပ်ႉၼၼ်ႉယူႇ။ သင်မီးတၢင်းယၢမ်ႈ ဢမ်ႇဝူၼ်ႉသီႇသွၼ်ႇႁႃႈသေ တွပ်ႇႁပ်ႉငၢႆႈငၢႆႈၸိုင် တၵ်းတေလႆႈဢဝ်ၶၢဝ်းယၢမ်း မႄးထတ်းၶိုၼ်းၵၢင်ၸႂ်ၸဝ်ႈၵဝ်ႇလီငၢမ်းယဝ်ႉ။
တူဝ်ယၢင်ႇမၼ်း မိူၼ်ၸိူင်ႉၼင်ႇမီးၵေႃႉမိုတ်ႈ ႁိုဝ် သေၵေႃႉ ၽိတ်ႈမွၵ်ႇၸူဝ်းႁွင်ႉၵိၼ်ၶဝ်ႈၶမ်ႈႁိုဝ် လူၺ်ႈလွင်ႈသင်ၵေႃႈယႃႇ သင်ၵၢၼ်ဢၼ်ၸဝ်ႈၵဝ်ႇ ႁဵတ်းပႆႇယဝ်ႉတူဝ်ႈ ဢမ်ႇၼၼ် ၸဝ်ႈၵဝ်ႇတိုၼ်းဢမ်ႇၶႂ်ႈၵႂႃႇၸိုင် ဢမ်ႇတၢပ်ႈလူဝ်ႇ ၼႄၶေႃႈဢၢင်ႈဢီႈသင်လူင်လၢင်၊ ၵူၼ်းၵူႈၵေႃႉၵေႃႈ ဢမ်ႇပေႃးၶႂ်ႈထွမ်ႇၶေႃႈဢၢင်ႈ၊ ၵမ်ႈၼမ်တႄႉ သင်ဢမ်ႇပဵၼ်လႆႈၵေႃႈဢမ်ႇလႆႈၼႆသေ လႆႈၸႂ်ၶေႃႈၶၢၼ်တွပ်ႇ သိုဝ်ႈယူဝ်းဢွၼ်ႇၼၼ်ႉၵူၺ်း။
ထႅင်ႈလွင်ႈၼိုင်ႈသမ်ႉ မိူၼ်ၸိူင်ႉၼင်ႇၸူဝ်ႈၶၢဝ်းတၢင်းပဵၼ်လူင် ၵူဝ်ႇဝိတ်ႉ-19 ၽွင်းၽႂ်ဢမ်ႇၽႂ် ၵိၼ်းၸႂ်ငိုၼ်းၶဝ်ႈၵၼ်ၼႆလႄႈ၊ သင်မီးသေၵေႃႉ မႃးယွၼ်းၵူႈယိမ်ငိုၼ်း ဢၼ်မႂ်းမီးတႃႇၵုမ်ႇသိုဝ်ႉၵိၼ် သွင်လိူၼ်ၼၼ်ႉ မႂ်းပၼ်ယိမ်ၵႂႃႇၶိုင်ႈၼိုင်ႈၼႆသေၵွၼ်ႇ၊ ၸႂ်ႈယဝ်ႉမၼ်းၵေႃႈတေယိၼ်းၸူမ်းမႂ်း မႂ်းၵေႃႈတိုၵ်ႉၵုမ်ႇၵိၼ်ၵႂႃႇ တႃႇတင်းလိူၼ်ယူႇၵေႃႈယႃႇ၊ ၵူၺ်းၼႃႇၼႂ်းၵႄႈၼၼ်ႉ သင်ၸမ်ပဵၼ်သေ မႂ်း ဢမ်ႇၼၼ်သေၵေႃႉ ၼႂ်းၵူၼ်းႁိူၼ်းမႂ်း ၵိုင်ႉၵၢင်ႉယူႇဢမ်ႇလီ ၵိၼ်ဢမ်ႇဝၢၼ်ၶိုၼ်ႈမႃးၸိုင် မႂ်းတေၶိုင်ၸိူင်ႉႁိုဝ် ႁူႉၵႃႈမႂ်းတေၼၵ်းၸႂ်ယူႇ၊ မႂ်းၵႃႈလႆႈဢဝ်ၵႅဝ်ႈသႅင်ငိုၼ်းၶမ်း ဢူၵ်ႉၸႃႇၶူဝ်းၶွင် တီႈမႂ်းမီးၵႂႃႇၵမ်ႉၶၢႆသေလႅၵ်ႈဢဝ် ပုၼ်ႈတႃႇပၢႆးယူႇလီမႂ်း လႄႈၵေႃႉမႂ်းႁၵ်ႉ ဢမ်ႇၸႂ်ႈႁိုဝ်၊ သင်ဝႃႈမႂ်းဢမ်ႇမီးဝႆႉဢူၵ်ႉၸႃႇငိုၼ်းၶမ်းၼၼ်ႉလူး မႂ်းသမ်ႉတေသိုပ်ႇႁဵတ်းၸိူင်ႉႁိုဝ်၊ တေဝႆႉၼႃႈလဵၵ်ႉတႃၼွႆႉသေ လႅၼ်ႈမိူဝ်းယိမ်တၢင်ႇၵေႃႉႁႃႉ၊ သင်ဢမ်ႇမီးလူး ၸွင်ႇမႂ်းတေယၢပ်ႇ၊ ယွၼ်ႉၼၼ်ယဝ်ႉ ၸင်ႇဝႃႈမၢင်ပွၵ်ႈမႃးၼႆႉ ၶႂ်ႈႁႂ်ႈမႂ်း “ဢမ်ႇ”ၸၢမ်းတူၺ်းသေလူး ပွၵ်ႈၼိုင်ႈၼႆၵႂႃႈ။
ယွၼ်ႉၼၼ် တီႈဢၼ်ၸဝ်ႈၵဝ်ႇ လီလႆႈတွင်းမၢႆဝႆႉၼၼ်ႉတႄႉ ပိူင်လူင်မၼ်း မိူဝ်ႈလႂ်ၸဝ်ႈၵဝ်ႇ တေသွၵ်ႈႁၼ်ၶိုၼ်းတူဝ်ၵဝ်ႇ ၼၼ်ႉၵူၺ်း၊ ဢၼ်ၼႆႉ ဢမ်ႇၸႂ်ႈဝႃႈမႂ်းဢမ်ႇၶႂ်ႈၸွႆႈထႅမ်သေ ဢမ်ႇႁဵတ်းသိုဝ်ႈယူဝ်း တေႃႇမၼ်း၊ ၸင်ႇဝႃႈ တီႈဢၼ်ၸဝ်ႈၵဝ်ႇဢမ်ႇၶႂ်ႈႁဵတ်းၼၼ်ႉ သင်ၸဝ်ႈၵဝ်ႇသမ်ႉႁပ်ႉမႅၼ်ႈၸိုင် ၵမ်းလိုၼ်းမႃး ၸၢင်ႈလႆႈႁပ်ႉၽွၼ်းႁၢႆႉမၼ်း ဢမ်ႇဢေႇၵေႃႈၼမ်ယူႇ၊ သင်သေယဝ်ႉ ပေႃးတေဢမ်ႇလီၵေႃႈ လီဢမ်ႇ (ဢမ်ႇႁပ်ႉ၊ ဢမ်ႇၽွမ်ႉ၊ ဢမ်ႇၸႂ်ႈ၊ ဢမ်ႇမီး၊ ဢမ်ႇပဵၼ်၊ ဢမ်ႇ ဢမ်ႇ ဢမ်ႇ….) ၼႆၸၢမ်းတူၺ်း။
လွင်ႈမႂ်းၽိုၵ်းႁႂ်ႈမေႃၶၢၼ်လၢတ်ႈ “ဢမ်ႇ” ၼၼ်ႉၵေႃႈ ပဵၼ်သၽႃႇဝၼမ်ႉၵတ်ႉတၢင်းၶႅၼ်ႇ ဢၼ်ၼိုင်ႈယဝ်ႉ။ “ဢမ်ႇ” ဢွၵ်ႇသူပ်းၼႆႉ လီၵေႃႈလီမေႃတေႉယူႇ။ ၸင်ႇဝႃႈ မိူဝ်ႈပႆႇဢိူဝ်ႈပႆႇၽွမ်ႉၼၼ်ႉ 1)လီမႄးထတ်းသၢင်တူၺ်းၶိုၼ်းတူဝ်ၵဝ်ႇ၊ 2)ပေလိုမ်းထၢမ်တူၺ်းၶိုၼ်းတူဝ်ၵဝ်ႇ၊ 3)ၸႂ်ႉၶၢဝ်းယၢမ်းသေဝူၼ်ႉတူၺ်းၶိုၼ်းႁႂ်ႈလီ၊ 4)ပေႃးတေမီးလွင်ႈတုမ်ႉတိူဝ်ႉၼႆ တင်ႈတႄႇၶေႃႈယွႆႈမၼ်း ဢမ်ႇလီၵေႃႈ လီ“ဢမ်ႇ” ၵႂႃႇယူႇ လႄႈ 6)သင်ဢမ်ႇလီၵေႃႈ ဢမ်ႇပေႃးလူဝ်ႇ ႁႃၶေႃႈဢၢင်ႈၶိုၵ်ႉၶၢႆးသင်လူင်လၢင်၊ 7)ပိူင်လူင်တႄႉၸဝ်ႈၵဝ်ႇ လူဝ်ႇမီးလွင်ႈသိုဝ်ႈယူဝ်းၼိူဝ်ၶေႃႈတွပ်ႇၵူၺ်းၵေႃႈ ပေႃးယဝ်ႉၼႆ ၶႂ်ႈယွၼ်းတူၵ်ႇသတိၼၼ်ႉထႅင်ႈယူႇဢေႃႈ။
ၶေႃႈၾၢၵ်ႇသမ်ႉၵမ်းလိုၼ်းတႄႉ ယွၼ်ႉၸဝ်ႈၵဝ်ႇ ပေႃးယၢမ်ႈဢိူဝ်ႈႁဵတ်းႁပ်ႉၸွႆႈမႃးတင်းၼမ်ယဝ်ႉလႄႈ ပေႃးတေဝႃႈ “ဢမ်ႇ” ဢမ်ႇပဵၼ်ဢမ်ႇမီးၼႆ ဢွၵ်ႇသူပ်းၵႂႃႇၸိုင် ႁူႉၵႃႈတေၼၵ်းၸႂ်သေ ႁၢင်ႈၾၢင်ၼႃႈတႃ ၵႃႈတေဢမ်ႇမေႃယူႇ၊ ၵူၺ်းပေႃးတေဢမ်ႇလီၼႆ မႂ်းၸၢမ်း “ဢမ်ႇ” တူၺ်းသေလူးပွၵ်ႈၼိုင်ႈ ယူဝ်လွင်ႈၼၵ်းၸႂ်မႂ်း ၶေးတေမဝ်လူမ်ၵႂႃႇယူႇႁိုဝ်။
21-Aug-2021
No comments:
Post a Comment