ယိူင်းဢၢၼ်းလူင် ဢၼ်သွၼ်လိၵ်ႈၼႆႉ ၵူၺ်းပဵၼ်တႃႇ ႁႂ်ႈမေႃလူမေႃဢၢၼ်ႇလိၵ်ႈ၊ သင်ဢမ်ႇလႆႈသွၼ်လိၵ်ႈၼႆ တေဢမ်ႇမေႃလိၵ်ႈ၊ ဢမ်ႇမေႃလိၵ်ႈၵေႃႈ တေဢမ်ႇမေႃဢၢၼ်ႇလိၵ်ႈ၊ ၽူႈၵေႃႉဢမ်ႇမေႃဢၢၼ်ႇလိၵ်ႈၼၼ်ႉၵေႃႈ တေဢမ်ႇႁူႉလႆႈသႃႇၽႃႇၵႂၢမ်းလၢတ်ႈ၊ တေဢမ်ႇၸၢင်ႈငိၼ်း ၸၢင်ႈႁူႉ ၸၢင်ႈမေႃပၺ်ႇၺႃႇတၢင်းၼွၵ်ႈထႅင်ႈၼၼ်ႉယဝ်ႉ။ သင်ဢမ်ႇႁူႉမေႃပၺ်ႇၺႃႇၵေႃႈ ဢမ်ႇဝႃႈၽူႈၵူၼ်းႁိုဝ်မိူင်းၼိုင်ႈလုၵ်ႈ ၵႃႈလႆႈတူၵ်းလိုၼ်းပိူၼ်ႈသေ တႅမ်ႇယေႃႈဢမ်ႇႁၢင်ႉ။ ယွၼ်ႉၼၼ် ၵူႈမိူင်းမိူင်း ၸင်ႇဢွၼ်ၵၼ်ပိုတ်ႇႁူင်းႁဵၼ်းသွၼ်လိၵ်ႈ ၼႆၶိုၼ်ႈမႃး။ ၶိူဝ်းၵူၼ်းမိူင်းဢၼ်မေႃလိၵ်ႈၼမ်ၼၼ်ႉၵေႃႈ ၶိုၼ်ႈယႂ်ႇမႂ်ႇသုင် ႁိူဝ်ႈႁိူင်းၶိုတ်းၵၢပ်ႈၶိုၼ်းၸၼ်ႉသေ ပဵၼ်ထႅၼ်ႈပိူၼ်ႈဝႆႉယူႇၼႆ တိုၼ်းမီးလၵ်းထၢၼ်မၼ်းဝႆႉယူႇသေတႃႉ ၵူၺ်းၵႃႈၼႂ်းၼၼ်ႉ ပေႃးဢမ်ႇပႃးပၺ်ႇၺႃႇၵေႃႈ ဢမ်ႇပဵၼ်မႃးလႆႈ။
ယွၼ်ႉၼၼ် မေႃလိၵ်ႈ လႄႈ မေႃပၺ်ႇၺႃႇသေလွင်ႈ တင်း မီးပၺ်ႇၺႃႇၼႆႉၵေႃႈ ဢမ်ႇမိူၼ်ၵၼ်။ မေႃလိၵ်ႈၼႆႉ မေႃလူမေႃဢၢၼ်ႇ လုၵ်ႉမႃးတီႈသွၼ်၊ မေႃပၺ်ႇၺႃႇၼမ်ႉၵတ်ႉသမ်ႉ ဢမ်ႇမေႃလိၵ်ႈၵေႃႈ ငိၼ်းသေ ႁၼ်သေ ၽိုၵ်းသေမေႃလႆႈ၊ မီးပၺ်ႇၺႃႇၼႆႉတႄႉ လုၵ်ႉမႃးတီႈ သွၼ် လႄႈ မေႃ တင်းလွင်ႈႁူႉႁၼ် ဢိၵ်ႇသတိ မႃးႁူမ်ႈၵၼ်သေ မီးၺႅၼ်ႇပၺ်ႇၺႃႇလႅတ်းၽၢႆတဵမ်ထူၼ်ႈ မေႃသိမ်းသိူင်ႇဝူၼ်ႉၵျၢမ်ႇထတ်းထွင်လွင်ႈၽိတ်းထုၵ်ႇ။
ၽူႈၵေႃႉမေႃလိၵ်ႈၼႆႉ လိူဝ်သေမေႃလူမေႃဢၢၼ်ႇယဝ်ႉ ၵႆႉလႄႇႁၢၼ်ႉၸႂ်ပႅၼ်မႅၼ် လွင်ႈဢွင်ႇမၢၼ်မၼ်း၊ ၵႆႉပိုတ်ႇငၢၵ်ႈၶႆႈဢုပ်ႇ လွင်ႈၸဵပ်းသႅပ်ႇၼႄပိူၼ်ႈသေ တၢင်ႇတၢင်းၽိတ်းသႂ်ႇၵူၼ်းတၢင်ႇၵေႃႉ၊ မေႃဢဝ်ႁဵၵ်ႈႁၢၼ်ႇသေ လိူၵ်ႈသဵၼ်ႈတၢင်းတုမ်ႉတွပ်ႇၵႄႈၶိုၼ်း ၵူၼ်းၵေႃႉႁဵတ်းၶဵၼ်သႂ်ႇ တင်းသိုဝ်ႈ၊ ဢၼ်တႃႁၼ်ထၢင်ႇပဵၼ်တေႉ၊ ဝူၼ်ႉၵျၢမ်ႇႁဵတ်းႁွတ်းလူင်ၵႂႃႇၵႃႈပဵၼ် ၼင်ႇၵႃႈတႃႈႁၼ်လႄႈၸႂ်ထၢင်ႇ၊ ၵူၺ်းထၢင်ႇတေလီ ဢမ်ႇဝူၼ်ႉလွင်ႈၽိတ်းထုၵ်ႇသေ ၽိုတ်ႉၶဝ်ႈၸိမ်ပႃးၸွႆႈႁဵတ်းလူင်ၵႂႃႇ ၵူႈႁူးတၢင်း ၵူၺ်းဢမ်ႇမီးၼမ်ႉတွၼ်းၽွၼ်းလီသင်ဢမ်ႇၵႃး ပၢႆၸၼ်ၸဝ်ႈၵဝ်ႇလူမ်ႉၵွႆပႃး၊ ၵႆႉဢဝ်လွင်ႈတိူဝ်ႉၸႂ်ၸဝ်ႈၵဝ်ႇဢွၼ်ၼႃႈသေ ဢုပ်ႇငၢၵ်ႈၶႆႈၼႄႁႂ်ႈၵူၼ်းတၢင်ႇၵေႃႉထၢင်ႇယႂ်ႇယဝ်ႉ လႄႇမေႃႁပ်ႉဢဝ် မျႅတ်ႈတႃႇ လွင်ႈဢီးလူတီႈပိူၼ်ႈ။
ဢမ်ႇမေႃယိူၼ်ႉသီးၸႂ်လေႃးၽၸဝ်ႈၵဝ်ႇသေ ဢၼ်ၶႂ်ႈလႆႈၼၼ်ႉ ၵႆႉလႄႇဢဝ်ၸႂ်တေႃးသမေႃးႁတႅပ်းတတ်း၊ ယိုင်ႈပိူၼ်ႈယွင်ႈပိူၼ်ႈဢၢမ်း ယိုင်ႈၶႅၼ်းႁၢၼ်ႉၸႂ်ႁူမ်ၸူမ်း ၼႃႈသူပ်းပေႃးၵီႈ ဢမ်ႇႁုပ်းလႆႈ၊ လိူဝ်ၼၼ်ႉဢမ်ႇၵႃး မေႃသီႉၵႄႉထၢင်ႇလဵၵ်ႉပႃး ၵူၼ်းၸိူဝ်းတႅမ်ႇယေႃႈသေၸဝ်ႈၵဝ်ႇ ၼႆႉပဵၼ်တၢင်းယၢမ်ႈ ၽူႈမေႃလိၵ်ႈသဝ်ႇႁဝ်ႇၶဝ်ယဝ်ႉ။
ၵူၺ်းၵႃႈ ၽူႈမီးၺၢၼ်ႇပၺ်ႇၺႃႇၶဝ်သမ်ႉ ၵႆႉလႄႇဢဝ်လွင်ႈဢွင်ႇမၢၼ်ၸဝ်ႈၵဝ်ႇသေ ၸႂ်ႉတိုဝ်းႁဵတ်းပၼ် ၽွၼ်းလီပုၼ်ႈပၢင်ၵူၼ်းၼမ်၊ ပႅၵ်ႉသမ်ႉမီးလွင်ႈၸဵပ်းသႅပ်ႇတိူဝ်ႉမွင်ၸႂ် တၢၼ်ႇလႂ်မႃးၵေႃႈ ၸၢင်ႈမေႃယူႇတဵတ်ႇယဵၼ်သေ လဵပ်ႈႁဵၼ်းႁႃၸုတ်ႇၽိတ်းတူဝ်ၵဝ်ႇ၊ သင်မီးၵူၼ်းႁဵတ်းၶဵၼ်သႂ်ႇၵေႃႈ ၵႆႉမေႃသီးယိူၼ်ႉပွႆႇဝၢင်းၶႂၢင်း တိူၵ်ႈတီႈဢမ်ႇလႆႈလႃးလႃးမႃး ယင်းၸၢင်ႈယူႇတဵတ်ႇတဵတ်ႇလူးၵွၼ်ႇ၊ တီႈဢၼ်ၵိုင်ႉၵၢင်ႉႁၼ်ၵေႃႈ ဢမ်ႇၵိုင်ႉၵၢင်ႉထၢင်ႇမၼ်းထုၵ်ႇ ဢမ်ႇၵိုင်ႉၵၢင်ႉယုမ်ႇမၼ်းၸႂ်ႈ တိုၼ်းမေႃလဵပ်ႈႁဵၼ်းထတ်းသၢင်သေ လိူၵ်ႈဢဝ်လွင်ႈထုၵ်ႇ ပႅတ်ႈဝၢင်းတီႈၽိတ်း ပဵၼ်တွၼ်ႈသွၼ်။ လွင်ႈဝူၼ်ႉၵေႃႈ ဢမ်ႇတူၺ်းၽၢႆႇၸဝ်ႈၵဝ်ႇၽၢႆႇလဵဝ်သေဝူၼ်ႉ၊ ၵူႈဢွင်ႈတီႈၼၼ်ႉ ဢမ်ႇမီးၵဝ်ဢမ်ႇယဝ်ႉလႆႈၼႆၵေႃႈဢမ်ႇဝႃႈ သင်ဢမ်ႇၸမ်ပဵၼ် ဢမ်ႇၵႆႉလႄႇၶဝ်ႈၸိမ်ပႃးၵႂႃႇၵူႈႁူးတၢင်း၊ လွင်ႈတိူဝ်ႉၸႂ်ၸဝ်ႈၵဝ်ႇၼၼ်ႉၵေႃႈ ၵႆႉမေႃၵဵပ်းသိမ်းဝႆႉႁင်းၵွၺ်းသေ မေႃသွၵ်ႈႁႃတၢင်းမူၼ်ႈသိူဝ်း ဢၼ်ၵၢင်းလွတ်ႈလွင်ႈၽိတ်း ပိူဝ်ႈတႃႇဝၼ်းမိူဝ်ႈၽုၵ်ႉ။
လေႃးၽၼၼ်ႉ မေႃဢဝ်ထမ်းတြႃးယိပ်းၵမ်မၼ်းယဝ်ႉ ႁိဝ်ႈၸင်ႈတူၺ်း လွင်ႈၶႂ်ႈလႆႈ လႄႈ လွင်ႈႁဵတ်းလႆႈသေ ႁၢၼ်ႉၸႂ်ၵႂႃႇ၊ သင်ၺႃးမိူဝ်ႈ မီးၵူၼ်းယွင်ႈဢၢမ်းမႃးၼၼ်ႉၵေႃႈ မၼ်းၶႂ်ႈလႆႈၶိုၼ်းဢီႈသင်ၼႆ ၸၢင်ႈမေႃလဵပ်ႈႁဵၼ်း ထတ်းသၢင်တူၺ်းၸွမ်း၊ ၼင်ႇၵႃႈပွင်ပဵၼ်လႆႈၼၼ်ႉ ၸၢင်ႈမေႃၸွႆႈထႅမ်ပိူၼ်ႈ ႁဵတ်းႁႂ်ႈၵူၼ်းတၢင်ႇၵေႃႉ ဢၼ်တႅမ်ႇယေႃႈသေၸဝ်ႈၵဝ်ႇၼၼ်ႉ ၶိုၼ်ႈယူႇထိုင်ၸိၵ်းတီႈသုင် ၼႆႉပဵၼ်လွင်ႈႁဵတ်းႁူမ်ႈတၢင်းမွင်း ၽူႈမီးၺၢၼ်ႇပၺ်ႇၺႃႇၶဝ်ယူႇယဝ်ႉ။
ယွၼ်ႉၼၼ် ၼင်ႇႁိုဝ်တေၸၢင်ႈပဵၼ်လွင်ႈၸွႆႈထႅမ် ၼႂ်းၵၢၼ်လဵပ်ႈႁဵၼ်း တွၼ်ႈၵၢၼ်ထတ်းသၢင်ၶိုၼ်း တူဝ်ၵဝ်ႇဝႃႈ ၸဝ်ႈၵဝ်ႇပဵၼ်ၽူႈမေႃလိၵ်ႈႁႃႉ ပဵၼ်ၽူႈမီးၺၢၼ်ႇပၺ်ႇၺႃႇႁႃႉၼႆသေ ၸင်ႇပဵၼ်လႅမ်းသွၵ်ႈၽၢၼ်ႉႁုပ်ႈၶေႃႈမုၼ်းလီငၢမ်းသေ မႃးမႅင်ႇၼႄၵၼ် လူၺ်ႈသႂ်ႇတင်းႁူဝ်ၶေႃႈပွင်ႈလိၵ်ႈဝႃႈ “မေႃလိၵ်ႈသေ ပေႁႂ်ႈၽၢၼ်ပၺ်ႇၺႃႇ” ၼႆယူႇယဝ်ႉ။
ဢၼ်ၶႂ်ႈမႃးမႅင်ႇၼႄၸႅၵ်ႇၽႄပၼ်တႄႉ ပိူင်လူင်မၼ်းပဵၼ် မေႃလိၵ်ႈ လႄႈ မီးပၺ်ႇၺႃႇ ၵူၺ်းသႄႈ ၼႂ်းၵႄႈၼၼ်ႉ ဢၼ်ပဵၼ်မေႃပၺ်ႇၺႃႇတႄႉ တေဢမ်ႇပေႃးၶႆႈဢုပ်ႇၼမ်သေ ႁူဝ်ႁုပ်ႉမၼ်းတေႉပဵၼ် မေႃတိၼ်မေႃမိုဝ်း မေႃၵႃႉမေႃၶၢႆ မေႃႁဵတ်းမေႃလၢတ်ႈ မေႃၸွမ်းမေႃဢွၼ် မေႃသွၼ်မေႃပွင် ၸႃႉၵႂႃႇ ၽိတ်းႁိုဝ်ထုၵ်ႇ လီႁိုဝ်ႁၢႆႉၼၼ်ႉတႄႉ ၵမ်ႉတၢင်းမေႃမၼ်း ယူႇယဝ်ႉ။
ၶေႃႈလိုၼ်းသုတ်း/
ၵူႈၵေႃႉၵူႈသွၼ်လိၵ်ႈ ၵူႈဢမ်ႇမေႃလိၵ်ႈ၊ ၵူႈၵေႃႉၵူႈမေႃလိၵ်ႈ ၵူႈဢမ်ႇမေႃပၺ်ႇၺႃႇ၊ ၵူႈၵေႃႉၵူႈပဵၼ်သြႃႇၵေႃႈ ၵူႈသြႃႇႁိုဝ်မီးပၺ်ႇၺႃႇ၊ လွင်ႈၽၢၼ်ပၺ်ႇၺႃႇၼႆႉ တၵ်းလႆႈဢဝ်သတိမႃးႁွမ်း ၸွမ်းမႄးၵႄႈၵွၼ်ႇ ၸင်ႇပဵၼ်သြႃႇလီၽူႈၵေႃႉမီးပၺ်ႇၺႃႇ။
သင်မီးတီႈၽိတ်းပိူင်ႈႁိူင်ႈၵိူင်းၼႆ ၶႅၼ်းတေႃႈႁႂ်ႈလႆႈယွမ်းၼွမ်း လႄႈ ယွၼ်းႁႂ်ႈလႆႈၸိၸမ်ႈပၼ်ပွင်ႈလိၵ်ႈၶႃႈသေၵမ်း။
မႂ်ႇသုင်ၶႃႈ
18-Aug-2021
No comments:
Post a Comment