ႁႃတူဝ်ၵဝ်ႇႁႂ်ႈႁၼ် ယႃႇပၼ်သုမ်းယၢမ်းၸူဝ်ႈပၢၼ်

ၶေႃႈထၢမ် ဢၼ်ႁဝ်းၶႃႈ ယၢမ်ႈထုၵ်ႇထၢမ်မႃး ၸဵမ်ၵေႃႉလဵၵ်ႉ၊ ၸဵမ်မိူဝ်ႈႁဝ်းယင်းပႆႇႁူႉဝႃႈ ၼႃႈၵၢၼ် ပဵၼ်သင်…? ပွင်ႇသင်…? ၼၼ်ႉ ၵႆႉၵႆႉထုၵ်ႇထၢမ်ဝႃႈ “ၵေႃႉယႂ်ႇမႃး မႂ်းၶႂ်ႈပဵၼ်သင်…?”

သိုပ်ႇမီးႁူဝ်ၶေႃႈၸွမ်းမႃး ႁႂ်ႈႁဝ်းလိူၵ်ႈ ဝႃႈၶႂ်ႈပဵၼ် “မေႃယႃႁႃႉ...? သိုၵ်းပူဝ်ႇ…? Engineer ႁႃႉ…? မေႃသွၼ်ၼႂ်းႁူင်းႁဵၼ်း…?“ ၸႃႉၵႂႃႇ… ႁဝ်းလိူၵ်ႈလႆႈၸိူဝ်းၼႆႉၵူၺ်း။ ဢမ်ႇပၼ်ႁႂ်ႈႁဝ်းဝူၼ်ႉ တီႈႁဝ်းႁၵ်ႉ တီႈႁဝ်းလႆႈၸႂ် ၶႂ်ႈႁဵတ်း၊ ပေႃးလၢတ်ႈၼွၵ်ႈလိူဝ်ၸိူဝ်းၼႆႉ သမ်ႉဝႃႈမႂ်းဢမ်ႇထူးသင် ၵူၼ်းတင်းၼမ်ၵေႃႈ ဢွၼ်ၵၼ်ႁုၼ်ႉၼူဝ် ၶူဝ်သႄႉသွမ်းၸွမ်း။

လႄႈ ၶေႃႈထၢမ်ၸိူဝ်းၼႆႉ မႃးၽွမ်ႉၵၼ်တင်း လွင်ႈမုင်ႈမွင်းၶဝ် တီႈၶႂ်ႈႁႂ်ႈႁဝ်းပဵၼ်၊ ထိုင်တီႈမၢင်ပွၵ်ႈ တူဝ်ၵဝ်ႇဝူၼ်ႉဝႃႈ ႁဝ်းၵေႃႈၶႂ်ႈပဵၼ်၊ ထိုင်တီႈမၢင်ပွၵ်ႈႁဝ်းၵေႃႈ ၶႂ်ႈႁႂ်ႈလွင်ႈတၢင်းမုင်ႈမွင်းၶဝ် တဵမ်ထူၼ်ႈ။

ပေႃးၼၼ် မၢႆထိုင်ဝႃႈ မႂ်းလိူၵ်ႈၵၢၼ်ၼၼ်ႉ ႁႂ်ႈၽႂ်ပဵင်းပေႃးၸႂ်လႃႇ…?၊ ႁႂ်ႈၵူၼ်းတီႈႁိူၼ်း ပဵင်းပေႃးၸႂ်ႁႃႉ…? ဢမ်ႇၼၼ် ႁႂ်ႈၵူၼ်းႁိမ်းႁိူၼ်းပဵင်းပေႃးၸႂ်ၼႄႇ…? ႁိုဝ် ႁႂ်ႈပီႈၼွင်ႉ ဢမ်ႇၼၼ် တူင်ႇဝူင်းၵူၼ်း ပဵင်းပေႃး ႁၢၼ်ႉၸႂ်ၸွမ်းၵူၺ်းႁႃႉ…? ၼႆႉပဵၼ်ၶေႃႈထၢမ်။

ၵူၺ်းၵႃႈ သင်မႂ်းလိူၵ်ႈ တီႈဢၼ်မၼ်းထုၵ်ႇမႅၼ်ႈ လႄႈ တီႈဢၼ်မႂ်းထုၵ်ႇၸႂ်ၸိုင် ယႃႇပေသိုပ်ႇဢၢၼ်ႇပွင်ႈလိၵ်ႈၼႆႉ ၵႂႃႇထႅင်ႈယဝ်ႉ ၵိုတ်းဢၢၼ်ႇတီႈၼႆႉသေလႃႈ။ ပွင်ႇဝႃႈ မႂ်းလိူၵ်ႈသဵၼ်ႈတၢင်းသၢင်ႇထုၵ်ႇ ပုၼ်ႈတႃႇတူဝ်မႂ်းယဝ်ႉ။

ၵူၺ်းသမ်ႉ သင်မႂ်းပႆႇယုမ်ႇၸႂ်တူဝ်ၵဝ်ႇတေႉတေႉၸိုင် ပွင်ႈလိၵ်ႈၼႆႉ ၸၢင်ႈတေမီးၶေႃႈတွပ်ႇ ပုၼ်ႈတႃႇသဵၼ်ႈတၢင်းၸၢတ်ႈပၢၼ်တၢင်းၼႃႈမႂ်း ဢၼ်တိုၵ်ႉလိူဝ်ဝႆႉ။

ၵမ်းလိုၼ်း သင်ဝႃႈမႂ်း လိူၵ်ႈသဵၼ်ႈတၢင်း တီႈဢၼ်ႁဵတ်းႁႂ်ႈၵူၼ်းတင်းၼမ်ႁၢၼ်ႉၸႂ်၊ ၶဝ်ၸူမ်းၸွမ်းမႂ်း တီႈဢၼ်မႂ်း ႁဵၼ်းဢွင်ႇလႆႈၸုမ်ႈ၊ ၸူမ်းၸွမ်းတီႈမႂ်းလႆႈၵၢၼ်ႁဵတ်း ၵူၺ်းပေႃးၼႆၸိုင် ၵႂႃႇထႅင်ႈ (10)ပီႊ (20)ပီႊ (30)ပီႊ တၢင်းၼႃႈၸိုင် မီးၽႂ်တေမႃးဢဝ်ပုၼ်ႈၽွၼ်း ၸၢတ်ႈပၢၼ်မႂ်းၼႆ ယႃႇလိုမ်းဝူၼ်ႉၶၢမ်ႈပူၼ်ႉ။

မၢင်ပွၵ်ႈ တူဝ်ၵဝ်ႇၵေႃႈ ယၢမ်ႈပဵၼ်ၵူၼ်းၵေႃႉၼၼ်ႉ တီႈလိူၵ်ႈၵၢၼ် ဢၼ်ၵူၼ်းတၢင်ႇၵေႃႉ ပဵင်းပေႃးၸႂ်ႁၢၼ်ႉၸႂ်၊ တူင်ႇဝူင်းၵူၼ်း ႁၼ်ဝႃႈလီ၊ ၼႃႈႁိူၼ်းမီးတၢင်းသိူဝ်း၊ ၵူၼ်းႁိမ်းႁွမ်း ဢဝ်ၵုင်ႇ၊ လႄႈတူဝ်ၵဝ်ႇၵေႃႈဝူၼ်ႉဝႃႈ ပဵၼ်လွင်ႈမူၼ်ႈသိူဝ်း လႄႈ လွင်ႈဢွင်ႇမၢၼ် ၶွင်ၸဝ်ႈၵဝ်ႇ။

ၵူၺ်းၵႃႈ… ၵူၺ်းၵႃႈ… ၵၢၼ်ၼႆႉ ဢမ်ႇၵွမ်ႉၵူၺ်းမီး (10)ၼႃႈၵၢၼ် ဢၼ်ၵူၼ်းတင်းၼမ်ႁဵတ်း၊ (10)လွၵ်းၵၢတ်ႇ တီႈဢၼ်လူဝ်ႇ ၸိူင်ႉၵူႈပွၵ်ႈ၊ တေႃႇထိုင်မႂ်း ႁဵၼ်းယဝ်ႉမူတ်းယဝ်ႉၵေႃႈ လွၵ်းၵၢတ်ႇၵေႃႈ သမ်ႉပေႃးလႅၵ်ႈလၢႆႈၵႂႃႇယဝ်ႉမူတ်းယဝ်ႉ၊ လူၵ်ႈလုမ်ႈၾႃႉလူင်ၼႆႉၵေႃႈ လႅၵ်ႈလၢႆႈၵႂႃႇၸွမ်းငဝ်းလၢႆးမူတ်းယဝ်ႉ ဢမ်ႇၸႂ်ႈႁိုဝ်။

သင်ႁဝ်းမႃးလဵပ်ႈႁဵၼ်းတူၺ်းတေႉတေႉၸိုင် ၵူၼ်းၵေႃႉဢၼ်ပဵင်းပေႃးႁၢၼ်ႉၸႂ်ၼၼ်ႉ ၶဝ်ဢမ်ႇလႆႈမႃးလဵပ်ႈႁဵၼ်းၸွမ်းႁဝ်းသႄႈ၊ ၵၢၼ်မႂ်းႁဵတ်းယူႇမိူဝ်ႈလဵဝ်ၼႆႉ သင်ဝႃႈမႂ်းဢမ်ႇမီးတၢင်းသိူဝ်း ၸွမ်းမၼ်းၸိုင် ဢၼ်ၼႆႉယဝ်ႉပဵၼ်ၵၢၵ်ႇသေႃးလူင် ၽုၺ်ႇႁႂ်ႈႁၼ်ဝႃႈ တီႈမႂ်းလိူၵ်ႈၼၼ်ႉ ၼွၵ်ႈသေတူဝ်မႂ်းယဝ်ႉ ႁဵတ်းႁႂ်ႈၵူၼ်းတၢင်ႇၵေႃႉ ပဵင်းပေႃးႁၢၼ်ႉၸႂ်ၵူၺ်း မႂ်းဢမ်ႇလႆႈႁၵ်ႉမၼ်း။

ယွၼ်ႉပိူဝ်ႈၼၼ် တီႈၼႆႉၸင်ႇၶႂ်ႈမႃးမႅင်ႇပၼ် တီႈဢၼ်တေႁဵတ်းႁႂ်ႈမႂ်းမီးတၢင်းသိူဝ်း ၸွမ်းၵၢၼ် တင်ႈတႄႇမႂ်း လႆႈဢၢၼ်ႇလိၵ်ႈၼႆႉၵႂႃႇယူႇ။

ၸိူင်ႉႁိုဝ်လႄႈၼႆ-

(1) ၸဝ်ႈၵဝ်ႇ ႁၵ်ႉ လႄႈ လႆႈၸႂ် ဢၼ်လႂ်

(2) ၵူၼ်းၵမ်ႈပႃႈၼမ် မႃးထၢမ်ၸဝ်ႈၵဝ်ႇ လွင်ႈသင် ဢီႈသင်လၢႆလၢႆလႄႈ 

(3) ၸဝ်ႈၵဝ်ႇ ၵႄႈလိၵ်ႈပၼ်ႁႃ ႁႂ်ႈၽႂ် ၸိူင်ႉႁိုဝ်လႆႈၽွင်ႈ

ၵႅၼ်ၵၢင်သၢမ်ၶေႃႈ ၸိူဝ်းၼႆႉယဝ်ႉ မၼ်းပဵၼ်ၸုတ်ႇလိူမ်ႈတူၼ်ႈၸၢတ်ႈပၢၼ်တၢင်းၼႃႈမႂ်း။

ပေႃးမႃးထတ်းတူၺ်း ၸိူဝ်းၼႆႉယဝ်ႉ တေလႆႈႁၼ်ဝႃႈ ၼႂ်းၶၢဝ်းတၢင်းၼိုင်ႈပီႊၼႆႉ မႂ်းႁဵတ်းလႆႈသင် ပုၼ်ႈၽႂ် ၼမ်လၢႆၵႃႈႁိုဝ်၊ ၵူၺ်းၼႂ်းၶၢဝ်းတၢင်း သိပ်းပီႊ ဢၼ်မႂ်းႁဵၼ်းသေ ႁဵတ်းႁႂ်ႈၵူၼ်းတၢင်ႇၵေႃႉ ပဵင်းပေႃးၸႂ်ႁၢၼ်ႉၸႂ်ၼၼ်ႉသမ်ႉ ၵူၺ်းလႆႈၸႄႈၽိုၼ်ၼိုင်ႈ ဢၼ်မီးၸုမ်ႈၼၼ်ႉၵူၺ်း၊ ယွၼ်ႉၼၼ် ၶႂ်ႈႁႂ်ႈမႂ်းၸၢမ်းဝူၼ်ႉတူၺ်းဝႃႈ သင်မႂ်းႁဵတ်း တီႈဢၼ်မႂ်းႁၵ်ႉ ၼႂ်းၶၢဝ်းတၢင်း (10)ပီႊၸိုင် မၼ်းသမ်ႉတေပဵၼ်ၸိူင်ႉႁိုဝ်။

တီႈၼႆႉ ဢမ်ႇၸႂ်ႈဝႃႈ ဢမ်ႇႁႂ်ႈမႂ်းႁဵၼ်း၊ ႁဵၼ်းလႆႈၵႃႈႁိုဝ်လီၵႃႈၼၼ်ႉယဝ်ႉ၊ ၵူၺ်းပေႃးမႂ်းႁဵၼ်းၼႆ ၶႂ်ႈႁႂ်ႈမႂ်းႁဵၼ်းႁူႉဢဝ် ၵဵဝ်ႇလူၺ်ႈႁူဝ်ၶေႃႈ ႁႂ်ႈမၼ်းဢိူမ်ႈၸမ်ၵၼ်တင်း ၵၢၼ်ဢၼ်မႂ်းႁၵ်ႉ တီႈသုတ်း၊ ဢမ်ႇၸႂ်ႈႁဵၼ်း ႁႂ်ႈဢိူမ်ႈၸမ် ဢၼ်တူင်ႇဝူင်းၵူၼ်း လၢတ်ႈဝႃႈလီတီႈသုတ်း။

ၵူၺ်းၵႃႈ ၵၢၼ်ဢၼ်မႂ်းႁၵ်ႉၼၼ်ႉ မႂ်းၶူၼ်ႉႁၼ်ယဝ်ႉသေတႃႉ ႁဵတ်းသင်မႂ်းသမ်ႉတေမႃးလိူၵ်ႈ လွၵ်းၵၢတ်ႇဢွၼ်တၢင်းသေ ၸင်ႇမႃးႁဵတ်းၵၢၼ် ဢၼ်မႂ်းႁၵ်ႉ၊ ႁဵတ်းသင်မႂ်းသမ်ႉပႂ်ႉႁႂ်ႈမၢၵ်ႈမီးၵွၼ်ႇ ၸင်ႇတေမီးတၢင်းသိူဝ်းၸႂ်လႆႈ၊ မႂ်းတိုၵ်ႉပႂ်ႉဢီႈသင်ဝႆႉထႅင်ႉယူႇ၊ တေယူႇလၢႆလၢႆသေ ႁႂ်ႈၵူၼ်းတၢင်ႇၵေႃႉ ပူၼ်ႉၵႂႃႇတၢင်းၼႃႈၵေႃႉၼိုင်ႈယဝ်ႉၵေႃႉၼိုင်ႈၵူၺ်းႁိုဝ်…?။

တီႈတႅၵ်ႈမၼ်း မႂ်းၸၢမ်းယုၵ်ႉမိုဝ်းမႂ်းၶိုၼ်ႈမႃး ၽၢႆႇၼႃႈသေ ၵမ်တႃမိုဝ်းမႂ်းတူၺ်း ၸွင်ႇလႆႈႁၼ်ၵမ်မိုဝ်းမႂ်းဢၼ်မီးႁူးဝႆႉ၊ ၵူၺ်းၵႃႈ ဢဝ်ၵမ်မိုဝ်းမႂ်း ဢမ်ႇၼၼ် ႁႂ်ႈၵူၼ်းတၢင်ႇၵေႃႉ ၵမ်မိုဝ်းသေ ပႆႁၢင်ႇယၢၼ်ၵႆမႂ်းၵႂႃႇၵမ်းလွႆးလွႆးတူၺ်းၸိုင် ၸွင်ႇတိုၵ်ႉတေလႆႈႁၼ် ၵမ်မိုဝ်းဢၼ်မီးႁူးဝႆႉၼၼ်ႉထႅင်ႈယူႇႁႃႉ။

ၼႆႉယဝ်ႉ မၼ်းမိူၼ်တိုဝ်ႉတၢင်း တီႈဢၼ်မီးယူႇၽၢႆႇၼႃႈမႂ်း ၵူၺ်းမႂ်းဢမ်ႇယၢမ်ႈၾၢင်ႉမႅၼ်ႈ တူၺ်းႁၼ်မၼ်းသေပွၵ်ႈ၊ ၵူၺ်းပေႃးၵူၼ်းသေၵေႃႉ ၼမ်းၼႃႈပူၼ်ႉမႂ်းၵႂႃႇ မႂ်းသမ်ႉဝႃႈမႂ်းဢမ်ႇမီးတိုဝ်ႉတၢင်း၊ တီႈတႄႉမၼ်း မီးယူႇၽၢႆႇၼႃႈမႂ်းၵူၺ်း မႂ်းဢမ်ႇတၢဝ်းဢဝ်တိုဝ်ႉတၢင်းၼၼ်ႉလႄႈ မၼ်းၸင်ႇႁၢင်ႇၵႆမႂ်းၵႂႃႇ ၵမ်းဢိတ်းဢိတ်းယဝ်ႉ။

ယွၼ်ႉၼၼ် ၶႂ်ႈႁႂ်ႈမႂ်းၸၢမ်းထွႆလင်ၶိုၼ်းယၢင်ႈၼိုင်ႈသေ ၸၢမ်းပၵ်းၸႂ်တူၺ်း တိုဝ်ႉတၢင်းၼၼ်ႉလူး၊ လႄႈမႂ်းၵေႃႈပဵၼ်ၵူၼ်းၵေႃႉၼၼ်ႉလႆႈမိူၼ်ၵၼ်၊ သင်မႂ်းလိူမ်ႈတူၼ်ႈ တင်ႈတႄႇယၢမ်းၼႆႉၵႂႃႇၸိုင် ပဝ်ႉမၢႆၼၼ်ႉၵေႃႈ တေၶဝ်ႈၸမ်မႂ်းမႃးလွႆးလွႆးယူႇ၊ ၵူၺ်းၵႃႈ သင်မႂ်းဢမ်ႇတႄႇလိူမ်ႈတူၼ်ႈသေဢိတ်းၸိုင် မၼ်းၵေႃႈဢမ်ႇမီးပဝ်ႉမၢႆ၊ 

ၽႂ်သေဢမ်ႇဝႃႈ ၵူႈၵေႃႉၵူႈမီးလွင်ႈ လီၵူဝ်ႁင်းၽႂ်မၼ်းယူႇ၊ ၵူၺ်းၵႃႈ ၵူၼ်းၵေႃႉဢၼ်ႁဵတ်းလႆႈၼၼ်ႉ ယွၼ်ႉပဝ်ႉမၢႆသေ ၶဝ်ႁဵတ်းၵႂႃႇ ၼႂ်းၵႄႈတင်း တၢင်းၵူဝ်ၶဝ်လႄႈ ၶဝ်ၸင်ႇဢွင်ႇမၢၼ်ယဝ်ႉ။

ၽိုၼ်ဢိင်/ K.N.N

#ဢမ်ႈၶၢႆး (09 Feb 23)