ပွင်ႈလိၵ်ႈၽၢၼ်ႁူဝ်ၶေႃႈ

ၼႃႈႁိူၼ်းၼိုင်ႈလင်ၼႆႉ ပႅၵ်ႉသမ်ႉယၼ်ႇႁၢၵ်ႈမႃးတီႈ လွင်ႈႁၵ်ႉတၢင်းပႅင်းၵေႃႉယႃႇ ၵူၺ်းၼႃႇ လွင်ႈတႃႇမီးငိုၼ်းတွင်း တဵမ်ထူၼ်ႈၼၼ်ႉၵေႃႈ ႁူႉတေလႆႈၶတ်းၸႂ်မိူၼ်ၵၼ်။ တေႃႈၼင်ႇၼၼ် ၼင်ႇႁိုဝ် ၼႃႈႁိူၼ်း တေမူၼ်းမၼ်ႈၼၼ်ႉၵေႃႈ ႁူႉၵႃႈလႆႈဢဝ် သၸ်ႃႇလႄႈမႅတ်ႈတႃႇတြႃး ၸွမ်းထိင်းယူႇ။ ပိူဝ်ႈၼၼ် သွင်လွင်ႈၼႆႉ သင်ၶၢတ်ႇဢၼ်လႂ်ဢၼ်ၼိုင်ႈၸိုင် ႁူႉၵႃႈၼႃႈႁိူၼ်း ၼၼ်ႉ ဢမ်ႇတဵမ်ထူၼ်ႈလႆႈလႄႈ သွင်လွင်ႈၼႆႉၵေႃႈ ႁူႉတေလႆႈႁႂ်ႈၽဵင်ႇပဵင်းၵၼ် ၸိူင်ႉယႃႇၸူႇ(ၸွႆႉ)ၵွၼ်ႇ ၼႃႈႁိူၼ်းၼၼ်ႉ ၸင်ႇတေၸၢင်ႈမီး လွင်ႈသႃႇယႃႇမူၼ်ႈသိူဝ်းၵိုမ်းမၼ်ႈလႆႈ။

ယွၼ်ႉပိူဝ်ႈသင်ဢၼ်ဝႃႈၼၼ်ႉတႄႉ မိူဝ်ႈၵူၼ်းသွင်ၵေႃႉ ၾၢၵ်ႈၼႃႈႁိူၼ်း ယူႇႁူမ်ႈၵၼ်ယဝ်ႉ ႁူႉတေလူဝ်ႇ ႁိူၼ်း တႃႇယူႇသဝ်းသွၼ်ႈႁူမ်ႈ၊ တႃႇၵိၼ်လဵင်ႉတွင်ႉ လႄႈ ၼုင်ႈဝႆသမ်ႉ ႁူႉလူဝ်ႇ ငိုၼ်းတွင်း ၸိူဝ်းၼႆႉ ပေႃးမီးငိုၼ်းၵွၼ်ႇ ၸင်ႇတေၸွႆႈၵႄႈလိတ်ႈမၼ်းလႆႈ။

ၵူၺ်းၵႃႈ မီးငိုၼ်းတဵမ်ထူၼ်ႈယဝ်ႉ သမ်ႉဢမ်ႇမီးမႅတ်ႈတႃႇတြႃးတေႃႇၵၼ်ၸိုင် တႃႇတေယူႇလူၺ်ႈၸွမ်းၵၼ်ၵႂႃႇ တေႃႇၸူဝ်ႈၶၢဝ်းယၢဝ်းတႄႉႁူႉဢမ်ႇပဵၼ်လႆႈ။ ၵေႃႉၼိုင်ႈလႄႈၵေႃႉၼိုင်ႈ လိူဝ်သေ ႁႃတၢင်းၽိတ်းသႂ်ႇၵၼ်၊ ႁႃတီႈယုပ်ႈယွမ်းၵၼ်၊ ဢမ်ႇမေႃပွင်ႇၸႂ်ၼိူဝ်ၵၼ်၊ ဢမ်ႇယိူၼ်ႉသီးတေႃႇၵၼ်လႄႈ ဢမ်ႇဝၼ်းၼိုင်ႈၵေႃႈဝၼ်းၼိုင်ႈ ႁူႉတၵ်းၸတ်ႉတႅၵ်ႇ ထႅၵ်ႇငၢၵ်ႈၵၼ် ၼၼ်ႉပဵၼ်သၽႃႇဝ။ 

ငိုၼ်းတွင်းၼႆႉ လမ်ႇလွင်ႈပုၼ်ႈတႃႇ လွင်ႈယူႇၵိၼ်သေတႃႉ သၸ်ႃႇလႄႈမႅတ်ႈတႃႇတြႃးၼၼ်ႉၵေႃႈ လမ်ႇလွင်ႈတွၼ်ႈတႃႇ ၼႂ်းၵႄႈၵူၼ်းသွင်ၵေႃႉ ႁႂ်ႈယူႇလူၺ်ႈႁူမ်ႈၵၼ်ၵႂႃႇ ၶၢဝ်းႁိုင် ထိုင်သုတ်းၸူဝ်ႈပၢၼ်မိူၼ်ၵၼ်။ ယွၼ်ႉၼၼ် ၵၢၼ်ၵေႃႇသၢင်ႈၼႃႈႁိူၼ်းမူၼ်း ၼိုင်ႈဢၼ်ၼၼ်ႉၵေႃႈ ငိုၼ်းတွင်း ၸဵမ် မႅတ်ႈတႃႇတြႃး ႁူႉတိုၼ်းလႆႈၽဵင်ႇပဵင်းၵၼ် ၸိူင်ႉယႃႇၸူႇၼၼ်ႉယူႇ။

ယွၼ်ႉပိူဝ်ႈၼၼ် တႃႇပဵၼ်ၼႃႈႁိူၼ်းမူၼ်း ဢုၼ်ႇၸႂ်ၼိုင်ႈလင်ၼၼ်ႉ ၼွၵ်ႈလိူဝ်သေ ႁၵ်ႉၵၼ်ယဝ်ႉ ႁူႉတၵ်းလႆႈပိူင်ႇငမ်းဝႆႉပႃး ငိုၼ်းတွင်း လႄႈ မႅတ်ႈတႃႇတြႃး ၽဵင်ႇၽဵင်ႇပဵင်းပဵင်းၵၼ်သေၵွၼ်ႇ၊ သွင်လွင်ႈၼႆႉၵေႃႈ တေလႆႈမီးလွင်ႈလူင်ႉလႅင်း ပေႁႂ်ႈမီးလွင်ႈပူၵ်ႉၵႅင်းသိူင်ႇငမ်းတေႃႇၵၼ်သေၵမ်း။

မင်ဢဝ်ပွင်ႈလိၵ်ႈမၼ်းပေႃးယၢဝ်း ပဵၼ်သီႇႁႃႈႁၢဝ်း ၶႂ်ႈၶၢၼ်ႉဢၢၼ်ႇ ၵူၺ်းၵျၢမ်ႇသႂ်ႇႁူဝ်ၶေႃႈမၼ်းသမ်ႉပႆႇမေႃ၊ ဢေႃး… မင်ပွင်းလိၵ်ႈမၼ်းပေႃးသုတ်းတီႈၼႆႉၵေႃႈ တေႃႈသမ်ႉပႆႇမေႃသႂ်ႇႁူဝ်ၶေႃႈမၼ်းထႅင်ႈသႄႈ ႁႄႈႁႄႈ။

#Zai_Hkam

20-Nov-2021